एजेन्सी । आईसीसी टी-२० विश्वकपमा भारतीय टोलीलाई च्याम्पियन बनाउने प्रशिक्षक राहुल द्रविडको सम्झौता सकिएको छ । उनले आफ्नो कार्यकाल लम्ब्याउन चासो नदिएपछि नयाँ प्रशिक्षक चयन गरिएको छ ।
बीसीसीआईले मंगलबार जुलाई ९ मा गौतम गम्भीरलाई भारतीय क्रिकेट टोलीको नयाँ मुख्य प्रशिक्षकको रुपमा घोषणा गरेको थियो । अब यो प्रश्न पक्कै पनि सबैको मनमा उठ्नेछ कि द्रविडको स्थान लिने यी दिग्गजको पारिश्रमिक कति हुन्छ ?
मंगलबार, भारतीय क्रिकेट कन्ट्रोल बोर्ड (बीसीसीआई) का सचिव जय शाहले औपचारिक रूपमा गम्भीरको नियुक्ति घोषणा गरे, जुन लामो समयदेखि अपेक्षित थियो । तर, उनको पारिश्रमिक पूर्ववर्ती राहुल द्रविड र रवि शास्त्रीजस्तै हुने अनुमान गरिए पनि उनको तलब भने तय हुन बाँकी रहेको बताइएको छ ।
एक रिपोर्टका अनुसार भारतीय टोलीका पूर्व प्रशिक्षक राहुल द्रविडले बीसीसीआईबाट वार्षिक १२ करोड भारु तलब लिने गर्दथे । गम्भीरलाई पनि त्यति नै रकम अफर गरिएको बताइएको छ ।
गम्भीरको तलब द्रविड बराबर हुने
बीसीसीआईको एक स्रोतले पीटीआईलाई भन्यो, ‘गौतमका लागि जिम्मेवारी सम्हाल्नु बढी महत्त्वपूर्ण थियो, तलब र अन्य कुराहरूमा काम गर्न सकिन्छ । सन् २०१४ मा रवि शास्त्रीको जस्तै यो घटना हो जसमा उनलाई मुख्य प्रशिक्षक डंकन फ्लेचरको स्थानमा पहिलो पटक क्रिकेट निर्देशक बनाइएको थियो, जुन दिन रवि सामेल भए, उनीसँग सम्झौता पनि थिएन र पछि कुराहरू पूरा भयो । गौतमको मुद्दामा पनि केही विवरणमा काम भइरहेको छ । उनको तलब राहुल द्रविडको सरह हुनेछ ।’
