काठमाडौं । नेपाल सरकार मन्त्रिपरिषद्को २०८१ चैत ४ गतेको निर्णयअनुसार प्रहरी महानिरीक्षक (आईजीपी) पदमा पदोन्नति भएका दिपक थापाले मंगलबार दर्ज्यानी चिन्ह ग्रहण गर्नुभएको छ । सिंहदरबारस्थित गृह मन्त्रालयमा आयोजित विशेष समारोहमा गृहसचिव गोकर्णमणि दुवाडीले प्रहरी महानिरीक्षक थापालाई दर्ज्यानी चिन्ह प्रदान गर्नुभएको हो ।
समारोहमा गृहसचिव दुवाडीले प्रहरी महानिरीक्षक थापालाई बधाई ज्ञापन गर्दै उनको कार्यकाल सफलताको शुभकामना व्यक्त गर्नुभयो । उहाँले प्रहरी संगठनको गरिमा अभिवृद्धि गर्दै मुलुकमा शान्ति, सुरक्षा, सुव्यवस्था, सुशासन तथा अमनचयन कायम गर्न महत्वपूर्ण योगदान दिने विश्वास व्यक्त गर्नुभयो ।
प्रहरी संगठनप्रति प्रतिबद्धता
प्रहरी महानिरीक्षक थापाले नेपाल सरकार तथा गृह मन्त्रालयप्रति आभार व्यक्त गर्दै निष्पक्ष, इमानदार र निष्ठापूर्वक आफ्नो जिम्मेवारी निर्वाह गर्ने प्रतिबद्धता जनाउनुभयो । उहाँले अपराध रोकथाम, अनुसन्धान तथा कानूनी शासनलाई प्राथमिकता दिने उल्लेख गर्नुभयो । साथै, नेपाल प्रहरीलाई नागरिकमैत्री, जवाफदेही र प्रभावकारी सुरक्षा निकायका रूपमा विकास गर्ने लक्ष्य रहेको बताउनुभयो ।
आधुनिक अपराध चुनौतीहरू र सुरक्षात्मक उपायहरू
गृहसचिव दुवाडीले साइबर अपराध, लागूऔषध ओसारपसार, आत्महत्या, सवारी दुर्घटनालगायतका अपराध नेपाल प्रहरीका लागि चुनौती बनेको उल्लेख गर्नुभयो । उहाँले अपराध न्यूनीकरण गर्दै मुलुकको शान्ति सुव्यवस्था कायम गर्न प्रहरी महानिरीक्षकको भूमिका महत्त्वपूर्ण हुने बताउनुभयो ।
आईजीपी थापाको व्यावसायिक यात्रा
प्रहरी महानिरीक्षक थापा नेपाल प्रहरीको ३१ औं आईजीपी हुनुहुन्छ । भक्तपुर, सूर्यविनायक-८ सिपाडोलमा जन्मिनुभएका थापाले २०५२ भदौ १९ गते प्रहरी निरीक्षकका रूपमा सेवा यात्रा सुरू गर्नुभएको थियो ।
उहाँले प्रहरी नायब उपरीक्षक, प्रहरी उपरीक्षक, प्रहरी वरिष्ठ उपरीक्षक, प्रहरी नायब महानिरीक्षक, प्रहरी अतिरिक्त महानिरीक्षक हुँदै २०८१ चैत ४ गते प्रहरी महानिरीक्षक पदमा पदोन्नति हुनुभएको हो ।
राजनीतिशास्त्रमा स्नातकोत्तर गर्नुभएका आईजीपी थापाले विभिन्न राष्ट्रिय तथा अन्तर्राष्ट्रिय तालिम लिइसक्नुभएको छ। उहाँले ‘बिग डाटा पोलिसिङ’, ‘ट्रान्सनेशनल अर्गनाइज्ड क्राइम’, ‘एडभान्स्ड म्यानेजमेन्ट’ जस्ता प्रशिक्षण प्राप्त गर्नुभएको छ ।
समाजसेवा र व्यावसायिक योगदान
आईजीपी थापा सुप्रवल जनसेवा श्री, प्रवल जनसेवा श्री, गोरखा दक्षिणबाहु चौथो, संयुक्त राष्ट्रसंघ पदक, गद्दी आरोहण रजत पदक, प्रहरी सेवा पदकलगायत विभिन्न विभूषणबाट सम्मानित भइसकेका छन् । उहाँले अपराध अनुसन्धान, सुशासन प्रवर्द्धन तथा कानूनी शासन सुदृढ बनाउन महत्वपूर्ण भूमिका निर्वाह गर्दै आउनुभएको छ ।
नव नियुक्त आईजीपीको कार्यभार ग्रहण
दर्ज्यानी चिन्ह ग्रहण गरेपछि आईजीपी थापाले नेपाल प्रहरी प्रधान कार्यालय, नक्सालमा कार्यभार सम्हाल्नुभएको छ । उहाँलाई नेपाल प्रहरीका उच्च अधिकारीहरूले स्वागत गर्नुभएको थियो ।
आईजीपी थापाले अमर प्रहरी स्मारकमा पुष्प अर्पण गर्दै वृक्षारोपण समेत गर्नुभयो । नयाँ नेतृत्वले नेपाल प्रहरीको साख अभिवृद्धि गर्दै अपराध नियन्त्रण, अनुसन्धान तथा सुव्यवस्था कायम गर्न प्रभावकारी रणनीति अवलम्बन गर्ने अपेक्षा गरिएको छ ।
