एजेन्सी । टिभीकी चर्चित अभिनेत्री अनिता हसनन्दानीले आफ्नो जीवनसँग जोडिएको एउटा ठूलो खुलासा गरेकी छन् । अनिताले आफ्नो एक सामाजिक सञ्जाल पोष्ट मार्फत् टेलिभिजन उद्योगमा प्रवेश गरेको शुरुवाती समयदेखि नै आफू डिप्रेशनसँग लडिरहेको बताइन् । करियरको सुरुवाती दिनमा लगातार असफलताका कारण धेरै समस्याको सामना गर्नु परेको अनिताले बताइन् । यस क्रममा उनको सबैभन्दा मिल्ने साथी एकता कपुरले उनलाई सहयोग गरिन् ।
अनिताले एकता कपूर र पति रोहित रेड्डीसँगको सेल्फी फोटो शेयर गर्दै लामो पोस्ट लेखेकी छिन् । अनिताले लेखेकी छिन्, ‘यस्ताे प्राय: हुँदैन, जब तपाईँले आफ्नो लागि धेरै अर्थ राख्ने व्यक्ति भेट्नुहुन्छ । तिनीहरूको वरिपरि हुनुले तपाईंलाई थप प्रशंसा र उत्साहित महसुस गराउँछ । आज म मेरा दुई अभिभावक एन्जिल्स एकता कपूर र रोहित रेड्डीलाई सधैं मलाई साथ दिनु भएकोमा धन्यवाद दिन चाहन्छु ।’
अनिताले थप लेखेकी छिन्–‘म दुवैलाई केही भन्न चाहन्छु । तिमि नभएको भए आज म यो बिन्दुमा हुने थिएन । एकता तिमीले सिर्जना गर्ने हरेक बलियो महिला पात्रको प्रोटोटाइप हौ । तपाईं एक साँचो साथी र एक बलियो इच्छाशक्ति भएकी महिला हुनुहुन्छ । धेरै वर्षको मित्रता यस्तो सम्बन्धमा परिणत भयो जहाँ हामी कुनै प्रश्नै नगरी एक अर्काको लागि जे पनि गर्न सक्छौँ ।’
अनिताले थप लेखेकी छिन्, ‘म सानै हुँदाका दिनहरु सम्झन्छु । काम गर्ने भोक त थियो तर केहि थाहै थिएन । म मेरो सुरुको असफलताबाट तर्सिएँ, तर पछि तिमी मेरो जीवनमा आयौ । मलाई डिप्रेसनबाट बाहिर आउन मद्दत मात्र गर्नुभएन, मलाई नयाँ सुरुवात पनि दिनुभयो । कहिल्यै हार नमान्नु, मैले तपाईँबाट सिकेका लाखौं चीजहरू मध्ये एक हो । तिम्रो कारणले म आज सुरक्षित महसुस गर्छु ।’
सन् २००० को शुरुवातमा एकता कपूरको कभी सौतन कभी सहेली शो पछि मात्रै अनितालाई अभिनेत्रीको रुपमा चिनिन्छ । त्यसपछि अनिता हसनन्दानीले एकताले निर्माण गरेको ‘कुछ तो है’ मा काम गरिन् । यस बाहेक अनिताले सिरियल ये है मोहब्बते, नागिन ३ मा पनि काम गरिसकेकी छिन् ।
