काठमाडौं । महिनौँदेखि हराइरहेकी नेपाली नर्स ममता काफ्लेको हत्या आरोपमा उनका श्रीमान् नरेश भट्टमाथि मुद्दा चलाइएको छ । अमेरिकी समाचार संस्था सीएनएनका अनुसार, जुलाईको अन्त्यतिर ममताको हत्या गरेर शव लुकाएको आरोपमा नरेशविरुद्ध अदालतमा बहस सुरु हुने तयारी भएको छ ।
नरेश, जो भूतपूर्व अमेरिकी सेना हुन्, मंगलबार अदालतमा पेस हुँदैछन् । यस क्रममा उनलाई औपचारिक रूपमा अभियोग लगाइने जनाइएको छ । मानसास पार्क प्रहरीका अनुसार नरेशले जुलाई ३० मा ममताको हत्या गरेको प्रमाण फेला परेको छ ।
ममताको घरमा भेटिएको रगतको डीएनए जाँचले उक्त रगत उनको भएको पुष्टि गरेको छ । प्रहरी प्रमुख मारियो लुगोका अनुसार, सुरुबाटै हत्या भएको आशंका रहेको र यो पुष्टि हुन डीएनए र अन्य प्रमाणले सघाएको छ । तर, ममताको शव अहिलेसम्म फेला परेको छैन । प्रहरीले शवको खोजी जारी राखेको जनाएको छ ।
ममता प्रिन्स विलियम मेडिकल सेन्टरमा नर्सको रूपमा काम गर्थिन् । उनी अन्तिमपटक जुलाई २७ मा काममा पुगेकी थिइन् । अस्पतालमा नआएपछि सहकर्मीहरूले प्रहरीलाई उनी हराएको जानकारी गराएका थिए ।
अगष्ट २ मा प्रहरीले ममता र नरेशको घरमा सोधपुछ गरेको थियो । सो क्रममा नरेशले अन्तिम पटक ममतालाई जुलाई ३१ मा भेटेको दाबी गरेका थिए । तर, प्रारम्भिक अनुसन्धानपछि प्रहरीले २२ अगष्टमा उनलाई ममतालाई बेपत्ता पारेको अभियोगमा पक्राउ गरेको थियो ।
लामो अनुसन्धानपछि, नरेशले ममताको हत्या गरेर शव लुकाएको प्रमाण अदालतमा प्रस्तुत गरिएको छ । हाल उनी प्रहरी हिरासतमा छन्, र मुद्दा अघि बढिरहेको छ ।
